Anna Rósa grasalæknir á Útvarpi Sögu

Gestur minn í þættinum Fegurð og heilsa á Útvarpi Sögu í dag, verður Anna Rósa grasalæknir. Anna Rósa lærði grasalækningar í Bretlandi í fjögur ár og er félagi í Breska grasalækningafélaginu: The National Institute of Medical Herbalist en það er elsta félag grasalækna í heimi, stofnað árið 1894 en til að fá inngöngu í það þarf að hafa B.Sc gráðu eða sambærilega menntun. Hún lauk námi fyrir 18 árum og starfaði í mörg ár við ráðgjöf á eigin stofu en síðan tók hún sér hlé eftir að hafa lokið  B.Sc. gráðu í viðskiptafræði frá Háskólanum í Reykjavík 2004. Anna Rósa grasalæknir hefur um árabil búið til sínar eigin tinktúrur úr íslenskum og erlendum lækningajurtum. Tinktúrurnar hefur hún sérblandað í handa hverjum og einum.  Á þeirri reynslu byggir Anna Rósa uppskriftirnar af tinktúrunum sem eru að langmestu leyti úr ferskum íslenskum lækningajurtum. Þær eru handtíndar á svæðum fjarri umferð og tilbúnum áburði. Erlendu lækningajurtirnar, eins og engifer og sólhattur sem vaxa ekki á Íslandi eru undantekningarlaust lífrænt vottaðar.

Það verður fróðlegt að ræða við hana um lækningamátt íslenskra jurta og framtíð graslækninga. Útvarp Saga FM 99,4 og www.utvarpsaga.is  kl. 15 í dag.